Мощеницкая (Дидович-Трипольская) Богдана Васильевна

Лета божего нароженья 1595 мсца июля 24 дня на року завитом за позвы подкоморскими от пана Щасного Харлинского, подкоморого земли Киевское, за жалобою Мелеха Барановича выдаными по панов Триполских Дедовичов пна Федора, пна Гапона, пна Ждана и пна Федора земян земли Киевское, припалом передо мною Семеном Уруцким, коморником земли Киевское, за писаньем листовым его мл. пана подкоморого Киевского на тую справу выехалем, которыи лист его мл. слов в слово тут ест вписан и так се в собе мает: "Коморнику земли Киевское врожоному пану Семену Родивоновичу Уруцкому. Ознаменуем твоеи мл. же пан Мелех Василевич Баран, земенин земли Киевское, из себром своим пном Титом Онофреевичом за декретом трибуналским позван позвы моими подкоморскими перед суд мои подкоморскии их мл. панов земан земли Киевское, то ест пна Федора, пна Гапона, пна Ждана и пна Федора молодшого Дедовичов Триполских и сестру их мл. паную Василевую Мощеницкую, подстолиную земли Киевское, паную Богдану Дедовну, на тот час держачую части брата ее мл. пана Ждана Триполского имена Клочков, ку розганиченю кгрунту именя своего, у воеводстве Киевском лежачого Глумова и на инших местцах, на жалобе пна Барана и сабра его в позвах моих подкоморских меновите описаных от именя их мл. пнов Триполских села Коцовщины и другого села Клочков. А иж я сам, подкоморыи, ку розганиченю тому на тот рок и час в позвах моих помененые, то ест месяца июля 24 дня, межи пном Бараном и сябром его а их млсти паны Триполскими не могучы быти для великих трудностеи и справ своих, которые теперь в Люблине на трибунале маю, тогды твою мл. пне коморнику, на местце свое высылам то справовать и, ведле декрету трибуналского и права посполитого заховываючыса, судит, граничить, и копцы сыпат а ведле вряду своего коморницкого всю тую справу кончит, маючи таковую моц, яко я сам, подкоморыи, в небытности моеи. Писан в Харлежу року 1595 месяца июля 7 дня. Щасный Харлинский подкомории земли Киевское, властною рукою." В того листу печат пна подкоморого. А на тот час при мне, звыш речоном коморнику земли Киевское, были при тое справе люди добрые, шляхта обывателе земли Киевское пан Василеи а пан Андреи Сурины, пан Федор Иванович Шишка, пан Марко Петрович а пан Григорий Масло и пан Филон Семашко, Кирик Лучич, а возных земли Киевское приданыи врадовне ку тои справе пном Триполским, а Кузма Ласко, а Костюк Мочулскии, возные земли Киевское, приданые ку тои справе пну Мелеху Барану.https://archive.org/stream/kyy...o_djvu.txt